(Extraits de "Tou seu, ch'est tou seu" de et par Marc Calou. Reproduction interdite !)

Quind t’es tou seu, mais alorse tou seu tou seu, dit te bin que te s’ras jémeu autint tou seu que quind te s’ras aveucque des gins alintour ed ti ! Y t’erwette point, y t’acoutes point, y n’te causes point ... mé y sont lo !

L’évolutiaw, al dit que ch’l’om y deskint du singe Quind in vo ches bono-bono, in ergrette d’in ête deskindu !

Si les hommes politiques, au lieu de s’engueuler, faisaient comme les bono-bono, il y aurait plus de femmes à l’Assemblée Nationale ... la parité serait bientôt la règle ! (en français dans le texte !)

Ches fimmes, ch’est comme ches apothicaires, vaut miux n’po y avoir à foaire

Quint eune fimme al buque ach huis, vaut miux tout d’suite s’foute dins ch’pu

Ches om', y ceurent apreu ch'cul des finmes. Quind ils l'ont, y save't pus quo in foaire

Monsse in in foait, pusse in bafelle !

(Marc Calou. Janvier à Mai 2005)

Tiot Mau

Tiot Mau y’est ti maboul ... ou bin ch’est ti eu sach’ ?

Toudis v'lo ti po qu'eu biau jour, Tiot Mau y met s’kémiche à séquer sus ch’fil dins sin courtil.

El lédmo’, y vot ti po qu’s’kémiche al a été voleu pindint l’nwi.

Y s’met à crieu : « Merchi, min Diu ... Merchi, min Diu .... Merchi ... »

S’finme qu’al l’intinds, al vo l’vir pis al li dit : « Mais cha vo po, non, t’es tou com’ po bin dins ed tiéte ... In t’vole et’kémiche et té ermerchie ch’Bon Diu ... T’es maboul ou quo ! »

Tiot Mau y li dit : « Mais infin, m’finme, té n’y coprinds rin ... j’ermerchie ech Bon Diu pasque, in défintif, j’aros bin pu ét’ dins m’kémiche quind in l’a voleu ! »

(Adaptation libre d’un conte de Nasreddine par Marc Calou. Mai 2005)

 

Ech beudet pis ch’cinsieu

Eu cinsieu, y s’in allot ach marché aveuc sin beudet

Y’arriv’t d’sus eu pont, ch’beudet y s’arrète net

Pus mo-in dé l’foaire avincher ni erculeu

Ech cinsieu y l’pousse, y l’ersaque, y li donne eu navieu

Rin à foaire, ech beudet y n’vu rin acouter

A forche, ech beudet y s’décide d’avincher

Les v’la tous deux sus ch’pont qui deberroule dins l’iau

Les v’la tous deux quéiu dins ch’erriot ...

 

El’ morale ed tout cha, si faut qué j’vous l’diches

Ch’est que ch’est toudis l’pus intelligint qui qu’miches

Cha a été ch’beudet qu'y a cédeu, pasqu’y’est po si bête

Pis cha a été ch’pont comme un con et que ch’étot eu fait’

Ch’cinsieu, li, y’a toudis rin compris à ch’histoère

M’est avisse qu’y sé l’démindes incoère !

(Marc Calou. Mai 2005)